台北當代藝術館 官方網站 Museum of Contemporary Art, Taipei

美術館到暗暝，會發生啥物代誌？
小被被的身軀予棉被包甲ân-ân，干焦露出目睭。伊佮好朋友小海豹準備欲出發去冒險，你敢欲做伙去？

這擺，阮邀請大人囡仔做伙來聽林思瑜 Lîm Su-jû (櫻桃老師）用台語講《當代館，晚點見》的故事。窗仔後壁藏咧啥物？走廊的彼一頭會拄著啥人？咱做伙共繪本一頁一頁掀開，看故事內底的角色咧創啥物，閣來聽看覓，用台語講出來的美術館故事，有啥物無仝款。

無論你平常時就會曉講台語，抑是干焦聽有幾句，攏歡迎做伙來。
耳空拍開，好奇心紮咧，綴小被被佮小海豹，做伙行入美術館的暗暝！ ⭓講師介紹

林思瑜Lîm Su-jû（櫻桃老師）
現職是專業的藝術教育者，是「非視覺藝術創作體驗計畫」的主持人，嘛是「和好玩實踐室」負責人。對2013年開始，用藝術創作體驗計畫，佮美術館、博物館、藝術家等合作。伊希望予藝術有閣較濟可能，透過實踐的精神，不斷的討論，予各種年紀、各種障礙類別的人，攏會當參與藝術創作，享受創作的趣味。 ⭓參加辦法
1.本活動免費參加，名額有限，愛事先佇網路頂報名。
2.囡仔愛有一位大人陪伴參加，報名的時陣，請共囡仔佮陪伴大人的資料做伙填。
3.報名資料送出了後，本館會寄確認批去你所寫的電子信箱；收著確認批就表示報名成功。
4.本館會佇活動進前３工寄「報到通知信」，說明報到的時間、地點佮愛注意的事項。
5.報名了後若無法度來參加，請一定愛提早通知本館，予別人有機會參加。

⭓活動須知
1.請照「報到通知信」內底寫的時間佮地點報到；陪囡仔來的大人愛佮囡仔做伙參加規場活動。
2.逐禮拜六、禮拜日10:00–12:00是本館的「親子日」，大人佮囡仔做伙佇這段時間入館，會當免費參觀；其他時間若欲參觀當期展覽「美術館之後」，請照本館的票價佮優惠規定買票入場。
3.活動規个過程禁止錄音、錄影佮直播；會使翕相，毋過請莫用閃光燈。
4.活動期間，本館會翕相紀錄，用佇成果保存、教育推廣佮非營利的宣傳。
5.若因為風颱抑是其他不可抗力的因素，臺北市政府公告停班停課，本活動就取消，袂閣一个一个通知。
6.本館保留變更活動的權利。除了頂一項的情形以外，活動若因為其他原因延期抑是取消，會另外通知已經報名的人。